Esrar Dede’nin Gazelleri
Esrar Dede, on sekizinci yüzyıl dîvân şâirlerinden ve mevlevî şeyhidir.
ESRAR DEDE’NİN GAZELLERİ
GAZEL 1
Azm-i sefer ettin dil-i nâçârı unutma
Gittin güzel ammâ bu dil-efkârı unutma
Gâhîce uyandıkça şebistân-i safâda
Şol gice olan sohbet-i hemvârı unutma
Vardıkça şeker-hâba girip bister-i nâza
Ne zehr içer dîde-i bîdârı unutma
Ben sabr edeyim derd ü gam-i hecrine ammâ
Sen de güzelim ettiğin ikrârı unutma
Ağlatmayacaktın yola baktırmayacaktın
Ol va’de-i tekrâr-be-tekrârı unutma
Yok tâkati hicrânına lûtf eyle efendim
Dil-haste-i aşkın olan Esrârı unutma
Dîvân
Gazel
Gitdin ammâ ey şâh-levendim tîz gel
Beni çok yollara bakdırma efendim tîz gel
Gel gel ey rûh-ı revân-bahş-ı dil-i nâ-çârım
Hasteyim bister-i hicrâna döşendim tîz gel
Seni görmeyeli bu dîde-i hûn-efşânım
O kadar agladı kim ben de begendim tîz gel
Belimi bükdü beni hâke düşürdü firkat
Dest-gîr ol meded ey serv-i bülendim tîz gel
Bilirim va’d-i vefâ eyledigiñ gerçekdir
Lîk yok sabra mecâl ‘işve-pesendim tîz gel
Yakmadan bahr ü beri âteş-i âh-ı Esrâr
Keşti-i nâza süvâr ol da efendim tîz gel
Gazel
Derd-i dile bî-gâne vü mahrem güler ben aglarım
Özge belâ kim hâlime ‘âlem güler ben aglarım
Hîç kimseye olmuş degil böyle belâ-yı bü’l-aceb
Kim beytü’l-ahzân-ı dilimde gam güler ben aglarım
Çeşmim gül-i dûzah-nejâd eşkim şerâr-ı fitne-zâd
Zevkim gamımdır aglasam nâlem güler ben aglarım
Gül gibi hûn-seyyâleyim gül-berg-i âteş-jâleyim
Cânâne-meşreb âşıkım işvem güler ben aglarım
Nâz u niyâza vakt yok hayrân olur görse gözüm
Ancak hemân ol dil-ber-i gül-fem güler ben aglarım
Nâdîde bir dîvâneyim başdan başa efsâneyim
Hicrânımın ahvâline mâtem güler ben aglarım
Sâz-ı cünûn âgâz eder efgânıma dem-sâz olur
Her nagme-i eyvâha zîr ü bem güler ben aglarım
Nahl-i ümîde el sunar handân ol giryân men
Esnâ-i ekl-i dânede Âdem güler ben aglarım
Dil sînede bir bahr-i hûn Esrâr bî-sabr u sükûn
Gerçi gül-i zahm-ı derûn her dem güler ben aglarım
(Horata, Osman (hzl.) (1998). Esrâr Dede, Hayatı, Eserleri, Şiir Dünyası ve Dîvânı. Ankara: KB Yay. 460-61, 470-71.)
